ماشي يا وطن ماشي شعر/صلاح جلال

وماشي يا وطن ماشي
ومتشكر .. أنا ماشي
وعيني اللى انت أبكيتها
وما اهتميت بدمعتها
كانت بتبات وتحلم بك
ولو تزعل ما تهناشي
لكن يللا باقول لك ايه
أنا ماشي

وماشي يا وطن آسي
يا ناسيني ومش ناسي
وباستغرب ومش فاهم
صحيح تقصد تغربني
مابين أهلي وبين ناسي ؟
وضقت خلاص بأنفاسي
ورب الكون أنا ابنك
ودمك في الوريد ماشي
لكن يللا باقول لك إيه
ما تزعلشي .. انا ماشي

أنا ماشي ومش ندمان
ما هو برضه حرام يعني
أعيش سقا وأموت عطشان
حرام أفضل ذليل لقمة تسيبها لي
وعايزني أكون إنسان
دموعي يا وطن جفت ..
خلاص تعبان .
خلاص حامشي
أشوف نفسي في أي مكان
ولو حانذل يا وطني .. وإيه يعني
مـ انا عايش هنا برضوا ذليل ومهان
وباتحاكم عشان فنان
وابات أغزل على نولي جلاليبك
وأنام عريان
حاجات تانيه كتير ياما ..
أقول ولا ما أقولهاشي
عموماً يا وطن حاسكت
لكن يللا باقول لك ايه
ما تزعلشي
انا ماشي

أنا ماشي وجوايا الألم مكبوت
وباسأل نفسي ميت مره ..
وانا شايف بعيني الموت
صحيح كلمة وطن .. يعني
حنان أمك وأحضانها ؟
صحيح كلمة وطن ديت
تموت الناس علشنها
صحيح كلمة وطن قوة
صحيح جنه لسكانها
صحيح كلمة وطن آية
وأعلى ربنا شانها ؟
وبارجع تاني واتألم
واقول يمكن أكون غلطان
لأن الكلمة جوايا بدون معنى
ولا عنوان
ومكتوبة على جرحي
وقبل الكلمة فيه كلمة
وكان يا ما كان
..
عموماً يا وطن هانت ..
سفينة الموت على المرسا ..
آهي بانت ..
وليل البحر مستني
بإيدك يا وطن يللا وشيلني
أنا ماشي ..
لكن تسمح لي أتمنى ؟!!
وتسمعني ..!!

باقول يعني دا لو ممكن ..


لوارجع لك غريق عايم على شطك
باقول ممكن تسبلني ..!!؟


تبص ف عيني لو مره
تكفني ..؟!


تغطيني ولو مره
وتدفنّي ..؟!


تدفيني ولو مرة
وتحضني ولو مرة
وتبكي حتى لو مرة
ولو كانت دموع مرة
لكن عيط ما تبقاشي ..


أنا قصدي ..
عموماً يا وطن يللا
باقول لك ايه ما تزعلشي
أنا ماشي
وماشي يا وطن ماشي